Саламты Къолайы комеди «Зæлийы чындзытæ» ирон театры сценæйы .

« Назад

Саламты Къолайы комеди «Зæлийы чындзытæ» ирон театры сценæйы . 20.04.2018 16:53

Номдзыд ирон актер, Советон Цæдисы адæмон артист, Фыдыбæстæйы Стыр хæсты архайæг Саламты Къола ирон драматургийы хæзнадонмæ цы уацмыстæ бахаста «Дыууæ чындзæхсæвы», (ныффыста йæ Брытъиаты Зариффæимæ), «Сæрмæт æмæ йæ фырттæ» «Зæлийы чындзытæ», «Ус бирæгъ» Алы рæстæджыты æнтыстджынæй цыдысты ирон паддзахадон академион театры сценæйы. Иры артдзæсты сфæлдыстадон коллектив сæм рæстæгæй –рæстæгмæ кæй раздæхы, æмæ сæ адæмы зæрдæтæ кæй барухс кæны, уымæн æвдисæн ногæй та сценæйы æвæрд кæй æрцыд комеди «Зæлийы чындзытæ». Йæ сæвæрыныл та бацархайдта Цæгат Ирыстоны адæмон артисткæ Дзгойты Аллæ.

Спектаклы ирдæй æвдыст цæуынц хистæр æмæ кæстæрты ахастдзинæдтæ. Комкоммæ та æфсинты æмæ чындзыты ахастдзинæдтæ, стæй хистæрты æмæ кæстæрты уæздан æмæ рухс ахастдзинæдтæ. Ссæдз азы фæстæ та театр ногæй раздæхт ацы уацмысмæ. Цæмæн? Уымæн æмæ рæстæг æмæ дуг ивы, кæм хорзæрдæм. Кæм та йæ ивддзинад бынтон хорзмæ не ркæны. Фæлæ бинонты æхсæн ахастдзинæдтыл дæр рæстæджы гакк æнæ фæзынгæ ма уа, уымæн æнæ уæвгæ нæй. Саламты Къолайы пьесæтæ та кæд фæнды дæр ирон царды ахстджиаг фарстатыл дзурæг уыдысты. Цæмæй нæ адæмæн хорз æвзæрæй иртасын æнцон уа, юмор æмæ сатирæйы фæрцы сæ удыхъæды æмæ æхсæнады хъæндзинæдтæ феной, уый кæддæриддæр æфтыдта сагъæсы курдиатджын артист æмæ драматург Саламты Къолайы.

Спектакль «Зæлийы чындзытæ»–йы архайынц театры артистты астæуккаг æмæ кæстæр фæлтæр: Тæтæри–УФ–йы сгуыхт артист Фидараты Альберт, Зæли–РЦИ–Аланийы адæмон артисткæ Хуыбаты Нелли, Хъырым-артист Сугъаты Хъазыбег, Солтан–РЦИ– Аланийы сгуыхт артист Цæллагты Сослан, Руслан–артист Еналдыты Дмитрий, Кæлимæт-РЦИ–Аланийы адæмон артисткæ Дзасохты Иринæ, Фаризæт–РЦИ–Аланийы адæмон артисткæ Малхъарты Зæлинæ, Къуызыр–РЦИ–Аланийы адæмон артист Цæргæсты Дзамболат, Батрадз–артист Косты Хъазыбег. Алы артист дæр ацы спектаклы архайы йæ хъайтары сурæт уырнинагæй равдисыныл. Саив æй кодтой зæрдæйы арфæй æмæ мид æнкъарæнтæй цæуæг æнкъарæнтæй, хъуыдытæй æмæ мидисæй. Спектаклы сæйраг архайджытæ Зæли æмæ йæ цардæмбал Тæтæри, кæд алыхуызон удыхъæды æмæ равджы хицæуттæ сты. Зæли–тызмæггонд æмæ чысыл хиндзинад кæмæ хæццæ кæны, ахæм сылгоймаг. Тæтæри та уæздан, хиуылхæст лæг, уæддæр спектаклы кæронбæттæн хайы рабæрæг вæййы сæ дыууæ дæр сæ фыртты бинойнæгты кæй уарзындц. Æмæ уымæ гæсгæ Зæли дæр фæстагмæ æрфæлмæн вæййы. Æмæ йæ «сайд» «Хин митæ» чындзыты бафæлварынæн кæй кодта. ууыл басæтты. Спектаклы ис хъæлдзæг кæфтытæ (се вæрæг у РЦИ–Аланийы культурæйы сгуыхт кусæг Суанты Валери æмæ аив музыкæ (равзæрста йæ РЦИ–Аланийы адæмон артист Диамбегты Олег) Спектакль «Зæлийы чындзытæ»–йы премьерон равдыстытæ цæудзысты абон æмæ райсом. Ацы уацмысæй театр 16 майы сæхгæндзæн йæ 82 театралон сезон дæр.

Гасанты Валери.

Газет Рæстдзинад  20.04.2018.


Комментарии


Комментариев пока нет

Пожалуйста, авторизуйтесь, чтобы оставить комментарий.

Авторизация
Введите Ваш логин или e-mail:

Пароль :
запомнить