Новости

Search Our Site

Администратор: +7 (8672) 25-11-42 Касса: +7 (8672) 55-14-68

  • «Отелло». В.В. Тхапсаев
  • «Когда дрожит земля». В.В. Тхапсаев
  • «Сын Иристона». В.В. Тхапсаев
  • «Фатима». В.В. Тхапсаев
  • «Сын Иристона». В.В. Тхапсаев
  • «Отелло». В.В. Тхапсаев
Ирон театр! Ды Ирӕн йӕ рухс тынты хур дӕ Цӕгат Ирыстоны Тӕбӕхсӕуты Балойы номыл паддзахадон Ирон академион театр фыццаг хатт 1935 азы йӕ ӕмбӕрзӕн куы байгом кодта, уӕдӕй рацыд 85 азы. Уыцы бон сыгъзӕрин дамгъӕтӕй фыст ӕрцыд ирон театралон аивады историйы. Театры фыццаг артисттӕ ӕмӕ режиссертӕ бындур цы традицитӕн сӕвӕрдтой, уыдон абон дӕр сты цӕрӕццаг. Куыд нӕ уыд уыцы гыргъахъ ӕмӕ гакъон-макъон фӕндагыл цӕлхдуртӕ. Фӕлӕ, иугӕр дӕ ныфс сценӕмӕ рацӕуынмӕ бахастай ӕмӕ театрдзауы бӕрны бацыдтӕ, уӕд уыцы кадджын номы уаргъ де ‘ккойӕ цыфӕнды зын уавӕрты дӕр дӕлӕмӕ ‘руадзын хъуамӕ ма бауадзай, знаджы нӕмыг дӕм мӕлӕты номӕй куы дзура, уӕддӕр дӕ равзӕрст фӕндагӕй фӕрсӕрдӕм ма аздӕхай. Хъуамӕ йӕ кӕронмӕ хӕссай сыгъдӕгӕй. Удӕгас цыртдзӕвӕнтау адӕмы зӕрдӕты баззадысты Таутиаты Солӕман, Цӕрукъаты Алыксандр, Тӕбӕхсӕуты Бало, Хъӕрджынты Варварӕ, Цырыхаты Петр, Икъаты Серафин, Хъариаты Тамарӕ, Баллаты Валодя, Хъалӕгаты Федыр, Саламты Къола, Сланты Къоста, Хуырымты Уырызмӕг, Мӕхъиты Валодя, Кочысаты Зоя, Годжысаты Исахъ, Уататы Бибо, Бирӕгъты Къоста, Тлаттаты Бексолтан, Дзиуаты Анатоли, Дзытиаты Лактемыр, Бытъӕты Роберт… театрӕн йӕ цард чи снывонд кодта, уыдон иууылдӕр.
Ирон театр! 85 азы ды Ирӕн йӕ рухс тынты хур дӕ! УФ-йы сгуыхт ӕмӕ РЦИ-Аланийы адӕмон артист Колыты Владиславы разамындӕй абон, фарны фӕндагыл цӕугӕйӕ, ныфсджын къахдзӕфтӕ кӕй кӕны, уымӕн ис бирӕ дӕнцӕгтӕ. Ирон театрдзау нӕ артисттыл йӕ уарзондзинад кӕй тауы, уым дӕр, ӕвӕццӕгӕн, диссагӕй ницы ис. Фӕлӕ, республикӕйы ӕддӕ национ театрты фестивалты архайгӕйӕ, къамисы уӕнгтӕ нӕ артистты сӕ профессионалондзинады тыххӕй, иннӕтӕй уӕлдай, бӕрзонд куы сисынц, сӕ ӕрдзӕй лӕвӕрд курдиат сӕ дисы куы бафтауы ӕмӕ сӕ минмырон, бӕзӕрхыг хъӕлӕстӕ залы куы азӕлынц, уӕд Ирон театры, ирон адӕймаджы кад афтӕ бӕрзонд сисынц сӕ уӕлтӕмӕны базыртыл, ӕмӕ йӕм зӕхмӕ ӕрхизын нал фӕцӕуы! Уый дзурӕг у ӕрмӕстдӕр уӕлахизыл! Уый дзурӕг у стыр ӕнтыстдзинадыл, ӕрыгон артисттӕ театры академион статус дӕлдӕр кӕнын кӕй нӕ уадзынц, ууыл! Бафиппайын хъӕуы, Цӕгат Кавказы национ театрты ‘хсӕн академион театры ном ӕрмӕст Ирон театр кӕй хӕссы, уый! Ирон театр! Кад ӕмӕ дын намыс ӕнусмӕ! — Владислав, фыццаджыдӕр, айс нӕ зӕрдиаг арфӕтӕ юбилейы фӕдыл. Ирон театры сӕргъы ӕрлӕууыдтӕ ӕртӕ азы размӕ. Уымӕй размӕ куыстай нӕ республикӕйы сывӕллӕттӕ ӕмӕ рӕзгӕ фӕлтӕры театр "Саби"-йы аивадон разамонӕгӕй, Дзӕуджыхъӕуы администрацийы Культурӕйы управленийы разамонӕгӕй. Уыцы-иу рӕстӕг ЦИПУ-йы аивӕдты факультеты театралон хайады ахуыргӕнӕгӕй ӕмӕ Цӕгат Ирыстоны Вахтанговы номыл Уырыссаг драмон театры артистӕй дӕр. Республикӕйы театрты сценӕты цы драматикон ӕмӕ романтикон хъайтарты сурӕттӕ сарӕзтай, уыдон баззадысты театрдзауы зӕрдӕйы. Цӕцӕны театралон аивады рӕзтмӕ стыр ӕвӕрӕн кӕй бахастай, уый тыххӕй хорзӕхджын ӕрцыдтӕ Цӕцӕны республикӕйы Культурӕйы министрады майдан "Бӕрзонд ӕнтыстдзинӕдты тыххӕй"-йӕ дӕр. Алы ран дӕр ныууагътай рӕсугъд фӕд. Ирон театрмӕ стыр фӕлтӕрддзинадимӕ кӕй ӕрбакъахдзӕф кодтай, уый ӕнӕфӕзынгӕ нӕ фӕцис йӕ рӕзтыл. Цы бирӕ фӕндтӕ дӕм уыд, уыдон царды рауагътай де ‘мкусджытимӕ, ӕмӕ хорзӕрдӕм сахадыдтой театры рӕзтыл. Уый та ууыл дзурӕг у, ӕмӕ театр раст фӕндагыл кӕй цӕуы. Цавӕр нысантӕ ӕвӕры театр абон та йӕ размӕ? — Театр у нӕ иумӕйаг хӕдзар, ӕмӕ дзы алчидӕр хъуамӕ иса хъармад, раст мӕнӕ къонайы артдзӕсты алыварс бинонтӕ куыд ӕрбамбырд вӕййынц, сӕхи куыд батавынц, афтӕ алы театрдзауы зӕрдӕ дӕр хъуамӕ батава артисты хъазт, сӕвзӕрын ӕм кӕна арф ӕнкъарӕнтӕ, йӕ зӕрдӕ йын бацагайын кӕна ӕмӕ йӕ баууӕндын кӕна, цы сурӕт сарӕзта, уый ӕцӕгдзинадыл, рафӕлдаха йын йӕ миддуне ӕмӕ йӕ рахона раст фӕндагмӕ уӕлахиздзауӕй, фӕхудын ӕмӕ йӕ фӕкӕуын кӕна алы уавӕрты бахаугӕйӕ. Артисттӕ хъуамӕ афтӕ ахъазой, цӕмӕй, спектакл куы фӕуа, уӕд театрдзауы йӕ хӕдзармӕ ацӕуынмӕ йӕ къах мауал хӕсса. Театры курдиатджын ӕмӕ куыстхъом артисттӕ хъазуатонӕй архайынц ацы хъуыддӕгтыл ӕмӕ сын ӕнтысгӕ дӕр кӕй кӕны, уый нӕ бон ныфсджынӕй зӕгъын у, цы арфӕйы фыстӕджытӕ райсӕм комкоммӕ ӕмӕ, социалон хызӕджы нын цы фӕрстӕ ис, уымӕ гӕсгӕ. Нӕ сӕйраг нысан у адӕмы зӕрдӕтӕ нӕ аивадӕй барухс кӕнын. Цӕмӕй-иу нӕ къӕсӕрӕй куы ӕрбахизой, уӕд сӕ ферох уой сӕ сагъӕстӕ, сӕ катай. Нӕ дуӕрттӕ кӕдфӕнды дӕр гом сты ахсджиаг ныхасӕн, хорз хъуыддӕгтӕ аразынӕн. — Цал артисты ис абон Ирон театры? — Театры абон ис 157 кусӕджы. Уыдонӕй 66 сты артисттӕ. — Режиссертӕ та? — Сӕбанты Тамерлан, Цӕриаты Валери, Мерденты Марат. — Ирон театр кӕддӕриддӕр хъуыстгонд уыд канд йӕ курдиатджын артисттӕй нӕ, фӕлӕ йӕ куырыхон хистӕртӕй дӕр. Уыдон сӕ фарнӕй хайджын кодтой кӕстӕр фӕлтӕры, ӕмӕ уый ахадыдта театры рӕзтыл. Цавӕр бастдзинӕдтӕ ис абон та театры фӕлтӕрты ‘хсӕн, цавӕр традицитӕ дзы сфидар? — Театр у царды айдӕн. Цыдӕриддӕр дзы цӕуы, уый ӕвдисы рӕстӕджы хуыз ӕмӕ хӕрзхъӕддзинад. Фӕлтӕрты ‘хсӕн цы ӕнгом бастдзинӕдтӕ ис, уыдонӕн бындур сӕвӕрдтой фыццаг студийы рауагъдонтӕ, Ирон театр, абон Ирон театр кӕй уды фарн ӕмӕ хъаруйӕ у, уыдон. ӕмӕ кӕмӕн ис бар уыдон фехалынӕн? Никӕмӕн! Театрӕн йӕ цард чи снывонд кодта, уыцы хистӕртӕ цалдӕрӕй ацы юбилейыл нал сӕмбӕлдысты. Сӕ цардӕй ахицӕн сты нӕ уарзон артисттӕ, Ирон театры астӕуккаг цӕджындзтӕ кӕй хуыдтам, уыдон. Се ‘нусон дунемӕ ацыдысты нӕ уӕздан хистӕр Тлаттаты Бексолтан ӕмӕ Лактемыр, артисттӕ йӕ сӕхимидӕг фырбуцӕн "Батя" хуыдтой. Нал райхъуысдзӕн сценӕйӕ Бытъӕты Роберты бирӕмырон зӕлланггӕнгӕ хъӕлӕс… Цы зӕгъа лӕг… ахӕм ӕмвӕзады артисттӕн вӕййы ӕрмӕстдӕр райгуырӕн бон. Сӕ нӕмттӕ та цӕрдзысты нӕ зӕрдӕты. Уыдонӕй алчидӕр бӕрзонд хаста артисты кадджын ном ӕмӕ йын нӕ бафсӕст лӕггад кӕнынӕй йӕ царды фӕстаг бонмӕ. — Дунейыл цы рын ӕртыхст, уый ныххӕлиу кодта адӕмы, къуылымпы кӕны алы къабазы куыст дӕр. Адӕмы ӕнӕниздзинад у ӕппӕты сӕйрагдӕр. Абон театр кусы. Кӕд спектаклтӕ не ‘вдисы, уӕддӕр артисттӕ сӕхи цӕттӕ кӕнынц театрдзаутимӕ фембӕлынмӕ ног премьерӕтимӕ. Ам цӕстытыл ауадысты Фыдыбӕстӕйы Стыр хӕсты азтӕ. Зын рӕстӕг артисттӕ хӕстонтӕ ӕмӕ фӕсчъылдымы архайджыты немыцы ныхмӕ тох кӕныны ӕмӕ уӕлахизмӕ разӕнгард кӕныны тыххӕй цы стыр куыст бакодтой сӕ аивады руаджы, уый. Абон кӕд рӕстӕг хуымӕтӕг нӕу, уӕддӕр къухы дзӕвгар бафтыд. Артистыл цыфӕнды зын рӕстӕг куы скӕны, уӕддӕр ӕнӕ сценӕ нӕ фӕразы. Йӕ дзӕбӕхгӕнӕг дӕр йӕ ролтӕ, сценӕ ӕмӕ театрдзауты къухӕмдзӕгъд сты. Цӕуыл кусут? Куыд байгом юбилейон сезон? — Уый ӕцӕг афтӕ у. Юбилейон театралон сезон байгом У.Шекспиры "Ричард III"-ӕй. Сӕвӕрдта йӕ режиссер Уалыты Гиви. Ирон ӕвзагмӕ йӕ ратӕлмац кодта Кокайты Тотрадз. Йӕ хӕдфӕстӕ нӕм уыд ног премьерӕ. Кӕсӕг-Балхъары республикӕйӕ хуынд режиссер Роман Дабагов ирон сценӕйы сӕвӕрдта нырыккон зындгонд драматург, Фыдыбӕстӕйы Стыр хӕсты архайӕг Виктор Розовы пьесӕ "ӕнустӕм цардӕгас". Ирон ӕвзагмӕ йӕ ратӕлмац кодта Айларты Асӕхмӕт. Пьесӕ сӕвӕрдтам Стыр Уӕлахизы 75 азы бонмӕ. Адӕм ӕй айстой. ӕнкъард ӕмӕ уӕззау пьесӕтӕм авнӕлдтам сезоны райдайӕны, ӕндӕр гӕнӕн дӕр нӕ уыд, фӕлӕ дарддӕр театрдзауӕн цӕттӕ кӕнӕм нӕ уарзон драматургты комедитӕ. Ныртӕккӕ куыст цӕуы Хуыгаты Георы комеди "Мӕ усы мад"-ыл. Сценӕйы йӕ ӕвӕры театры сӕйраг режиссер Сӕбанты Тамерлан. Хуыцауы фӕрцы, йӕ премьерӕмӕ нӕ уарзон театрдзауты фӕхондзыстӕм 3 декабры. Уый сын уыдзӕн нӕ лӕвар Ног азмӕ. 3 январы та сӕм ӕнхъӕлмӕ кӕсы нӕ ног лӕвар — Туаты Дауыты "Пӕсӕйы фӕндон". Йӕ режиссер — адӕмы уарзон Цӕриаты Валери. Уый ӕрӕджы ӕрбаздӕхт театрмӕ, ӕмӕ йӕ куыст йӕ разӕй фӕцис. Нӕ чысыл театрдзаутӕм Ног азы аргъаумӕ ӕнхъӕлмӕ кӕсӕм 15 декабрӕй. Нӕ ӕрыгон режиссер Хъӕцмӕзты Ацӕмӕз сын цӕттӕ кӕны "Хъӕлдзӕг музыканттӕ". — Уырыссаг классикӕйӕ та? — Ӕнӕ уымӕй размӕ цӕуӕн нӕй кӕцыфӕнды театрӕн дӕр. 1961 азы 27 мартъийӕ ЮНЕСКО-йы уынаффӕмӕ гӕсгӕ бӕрӕг кӕнынц Театры дунеон бон. Уӕдмӕ сӕвӕрдзыстӕм Александр Островскийы пьесӕ "Амонды дыргъдон" ("Правда — хорошо, но счастье лучше"). Йӕ режиссер уыдзӕн Мӕскуыйӕ хуынд — Валерий Маркин. Ирон ӕвзагмӕ йӕ ратӕлмац кодта Касаты Батрадз. А. Островскийы сфӕлдыстадыл дзургӕйӕ, аккаг аргъ скӕнын хъӕуы Тедтойты Зинаидӕйӕн, ӕрӕджы фыссӕджы пьесӕтӕ ирон ӕвзагмӕ тӕлмацӕй хицӕн чиныгӕй кӕй рауагъта, уый тыххӕй. Фыццаджыдӕр, уый у стыр лӕвар Ирон театрӕн, ӕмӕ 27 мартъийы нӕ зӕрды ис ацы чиныгӕн аккаг аргъ скӕнын презентацийы хуызы. Нӕ иннӕ лӕвар театрдзаутӕн ацы театралон сезоны уыдзӕн У. Шекспиры "Къарол Лир". Уый дӕр сӕвӕрдзӕн Мӕскуыйӕ хуынд режиссер — Олег Нагорничных. Артистты рӕзтӕн ахъаз у канд нӕхи режиссертимӕ нӕ, фӕлӕ хуынд режиссертимӕ кусын дӕр. Уыимӕ ма фидардӕр кӕнынц театртимӕ бастдзинӕдтӕ дӕр. — Ирон театрӕн ис стыр ахадындзинад кӕстӕрты хъомылады. Куыд цӕуы куыст семӕ? — Абон телеуынынад ӕмӕ Интернеты тыгъдадӕй цы бирӕ диссӕгтӕ ӕвдисынц, уыдонӕй сывӕллӕтты атонын ссис тынг зын. Уӕлдайдӕр та сӕ театрмӕ ӕрбахонын. Уый тыххӕй хъӕуы, цымыдисаг сын чи уа, ахӕм репертуарыл бакусын. Алы театралон сезоны дӕр сын бацӕттӕ кӕнӕм дыууӕ ног аргъауы. Зӕгъӕн ис, нӕ режиссертӕ кӕй ссарынц нырыккон мадзӕлтты фӕрцы сӕ зӕрдӕмӕ фӕндаг. Нӕ аргъӕуттӕ канд Ирон театры сценӕйы нӕ февдисӕм, фӕлӕ Дзӕуджыхъӕуы ӕмӕ республикӕйы хъӕуты скъолатӕ ӕмӕ рӕвдауӕндӕтты дӕр. Абон мах нӕ сомбоны театрдзауты нӕхӕдӕг куы нӕ бахъомыл кӕнӕм, театралон аивад сын куы нӕ бауарзын кӕнӕм, уӕд театрӕй адард уыдзысты. Уымӕ гӕсгӕ, нӕ бон цас у, уый бӕрц архайӕм сӕ зӕрдӕты сын ирондзинад тауыныл, ирон аив ныхас сын бауарзын кӕныныл. — Владислав, национ театрыл ирон драматургийы раз цы стыр хӕс ӕвӕрд ис, раст ирон драматургийыл дӕр театры раз, афтӕ. Куыд аразы театр йӕ куыст нырыккон автортимӕ? — Кӕдфӕнды дӕр ӕй фӕзӕгъын, Ирон театр ирон драматургийыл кӕй хъуамӕ ӕнцой кӕна. Уый у нӕ театры цӕсгом, уый нӕ кӕны национ, уый нын дӕтты хъару, куыд хицӕн адӕмыхатты хуыз, афтӕ. Уымӕ гӕсгӕ, кӕд нырыккон драматургтӕ боныгон рухсимӕ агургӕ сты, уӕддӕр нӕ бон рахъаст кӕнын нӕу, стӕй хъаст дӕр кӕмӕн кӕнӕм. Уӕвгӕ, уыцы уавӕры сты иннӕ адӕмыхӕттытӕ дӕр. Хъыгагӕн, рӕстӕджы ног домӕнтӕ сӕ кӕнон кӕнынц. Фӕлӕ, табу Хуыцауӕн, нӕ зындгонд драматургтӕ нын хъӕздыг сфӕлдыстадон бынтӕ кӕй ныууагътой, уый тыххӕй. Мӕрдты сыгъзӕрин талатӕ суадзӕнт. Нӕ фыдӕлтӕ-иу афтӕ загътой, фыдлӕг ӕмӕ, дам, фыдрӕстӕг бирӕ нӕ хӕссынц. ӕз дӕр мӕ зӕрдӕ дарын, уырнгӕ дӕр мӕ кӕны, нӕ фӕсивӕды ‘хсӕн рӕхджы драматургтӕ дӕр кӕй фӕзындзӕн. Ныртӕккӕ та уал фидӕны нӕ зӕрды сӕвӕрын ис Джусойты Нафийы пьесӕтӕй иу — "Кӕм дӕ, ме ‘фсымӕр Абель?". Нафийӕн уый уыд йӕ бӕллицтӕй иу. Дарддӕр дӕр нӕ хъус фылдӕр дардзыстӕм, ирон пьесӕтӕй сценӕйы ӕвӕрд чи нӕма ӕрцыд, уыдонмӕ. Ныхас цӕуы Дзантиаты Анатолийы "Анахарсис" сӕвӕрыныл дӕр. — Фӕндзай азӕй фылдӕр нӕ паддзахадон театры цалцӕггӕнӕн куыстытӕ кӕй нӕ уыд, уымӕ гӕсгӕ дзы лыггӕнинаг фарстытӕ — хӕрх. Бындуронӕй бавналын хъӕуы бирӕ хъуыддӕгтӕм. — Нӕ республикӕйы Сӕргълӕууӕг Битарты Вячеслав Ирон театры фарстытӕм йӕ хъус лӕмбынӕгӕй дары. Ныфс бавӕрдта, театр тагъд рӕстӕджы цалцӕггонд кӕй ӕрцӕудзӕн, уымӕй. Ныридӕгӕн уал цӕттӕ кӕнынц ӕхцайы хӕрдзты гӕххӕттытӕ. Фарон Битары-фырты руаджы раивтам нӕ рудзгуытӕ дӕр. Уый стыр лӕггӕдты бацыд Ирон театры хистӕр кары артисттӕн. Сӕ мыздӕн сын скодта зӕрдӕмӕдзӕугӕ ‘фтиӕгтӕ, кӕд бирӕтӕ куыстмӕ рагӕй нал цӕуынц, уӕддӕр сты ӕдыхст бирӕ хъуыддӕгты республикӕйы Сӕргълӕууӕджы ӕрхъуыдыдзинад ӕмӕ цӕстдарды руаджы. Хорз уаид, тӕлмацгӕнӕн хъусылдарӕн аппараттӕй театр ифтонггонд куы ‘рцӕуид, уый дӕр. Цы ӕнӕбары аппаратурӕтӕ нӕм ис, уыдон хъыгдарыны хос йеддӕмӕ абон ницыуал сты. Нӕхи бон сӕ балхӕнын нӕ бауыдзӕн, уымӕн ӕмӕ аслам не сты. Иу аппараты аргъ хӕццӕ кӕны 10 минӕй 25 мин соммӕ. Фыццаджыдӕр, ам хатыр курӕм, иронау чи не ‘мбары, нӕ уыцы театрдзаутӕй ӕмӕ сын зӕгъӕм бузныг, театрыл сӕ зӕрдӕ кӕй нӕ сивтой, уый тыххӕй. Нӕ иннӕ риссаг фарст у, декорацитӕ ласынӕн нын машинӕ кӕй нӕй, уый. Гастролты куы фӕцӕуӕм, уӕд нӕ бахъӕуы машинӕ баххуырсын. Уыдон та гыццыл хӕрдзтӕ не сты. — Нӕ республикӕйы Сӕргълӕууӕджы фӕдзӕхстытӕй иу уыд, цӕмӕй Ирон театр бабӕрӕг кӕна, клуб кӕм ис, уыцы хъӕутӕ иууылдӕр ӕмӕ сын равдиса спектаклтӕ. Куыд цӕуы ӕххӕстгонд ацы хъуыддаг та? — Ууыл стыр куыст цӕуы. Цалынмӕ нӕ карантин нӕ фӕкъуылымпы кодта, уӕдмӕ бабӕрӕг кодтам бирӕ хъӕутӕ, районты центртӕй алкӕцы дӕр, Мӕздӕгӕй фӕстӕмӕ. Кӕцыдӕр рӕтты та суанг цыппӕргай хӕттыты дӕр. Ныр, рӕстӕг куыддӕр фӕхуыздӕр уа, афтӕ фыццаг нӕ фӕндаг Мӕздӕгмӕ акӕндзыстӕм. — Куыд фӕзынд карантин театры куыстыл? — Къӕппӕджы нӕ баппӕрста. 2018 азы нӕ къухы бафтыд 208 спектаклы равдисын. Театрдзауты нымӕц нӕ хъазуатон куысты фӕрцы схызт бӕллиццаг ӕмвӕзадмӕ — 50 минӕй ахызт, ӕмӕ театр йӕхи хъарутӕй бакуыста 6 000 550 сомы. Ацы нымӕцтӕ иууылдӕр ахызтысты, нӕ размӕ цы хӕстӕ ӕвӕрд уыд, уыдоны сӕрты. Ома, фагӕй фылдӕр. 2019 азы равдыстам 220 спектаклы. Театрдзауты нымӕц — 48 964 адӕймаджы. Нӕ бакуысты бӕркад уыд 5 422 460 сомы. 2020 азы нӕ уавӕртӕ нӕхи бар кӕй нӕ уыдысты, уымӕ гӕсгӕ нӕ куыст тынг фӕкъуылымпы. Фӕлӕ уӕддӕр иу ран нӕ бадтыстӕм. Абоны онг равдыстам 55 спектаклы. Театрдзауты нымӕц — 6 100. Нӕ бакуысты бӕркад — 1 000 829 сомы. Ацы нымӕцтӕ дзуапп дӕттынц дӕ алы фарстӕн дӕр. — Иу театралон сезонмӕ цал спектаклы сӕвӕры Ирон театр? — Паддзахады пъланмӕ гӕсгӕ — ӕхсӕз — Цавӕр ног спектаклтӕ фӕзынд уӕ репертуары а фӕстаг рӕстӕг? — 2018 азы сӕвӕрдтам: Плиты Грисы "Чермен", режиссер — Сӕбанты Тамерлан; Айларты Асӕхмӕты — "Рӕстӕгмӕ ус", режиссер — Айларты Асӕхмӕт; Хуыгаты Георы "Ӕрдхорд ӕфсымӕртӕ", режиссер — Уалыты Гиви; Саламты Къолайы "Зӕлийы чындзытӕ", режиссер — Дзгойты Аллӕ; Ӕлбегаты Аланы инсценировкӕ ӕмӕ ӕвӕрд аргъау сывӕллӕттӕн "Нӕ хъӕды сырдтӕ"; А. Бартеневы аргъау "Митӕ", режиссер — Ӕлхъацаты Мӕдинӕ. 2019 азы: Гоголы "Ревизор", режиссер — Уалыты Гиви; Айларты Асӕхмӕты "Ирӕттӕ", режиссер — Сӕбанты Тамерлан; Рей Кунийы "Фыдуаг лӕппутӕ", режиссер — Челӕхсаты Эдуард; азербайджайнаг драматург Али Амирлийы "Хъӕздыг сылгоймаг", режиссер — Бахрам Османов. Сывӕллӕттӕн: "Ӕрсойы митӕ", режиссер — Ӕлхъацаты Мӕдинӕ. 2020 азы: У. Шекспиры трагеди "Ричард III", режиссер — Уалыты Гиви; Виктор Розовы драмӕ "Ӕнустӕм — цардӕгас", режиссер — Роман Дабагов. Кусӕм дарддӕр дӕр. Фӕндтӕ — Хуыцаумӕ! — Владислав, куыд хъуыды кӕныс, цӕмӕй сывӕллон театрыл ӕнувыд уа, уый тыххӕй йӕ цал азӕй хъӕуы театрмӕ хонын? Дӕ интервьютӕй иуы загътай, Ирон театрмӕ дӕхӕдӕг цӕуын кӕй райдыдтай, ӕртӕ азы дыл куы цыд, уӕдӕй фӕстӕмӕ. — Уый ӕцӕг афтӕ уыд. Мӕ фыд ӕмӕ мӕ мад иунӕг спектаклы премьерӕ дӕр никӕд фӕцух кодтой. Театрмӕ цыдыстӕм ӕгас бинонтӕй. Нӕхи-иу цӕттӕ кодтам рагацау. Абонау хъуыды кӕнын, мӕ мады райст-бавӕрды аив дзаумӕттӕ, мӕ фыды уӕлӕдарӕс. Уый-иу уыд бӕрӕгбон. Арӕх-иу нӕ хӕдзары уазӕгуаты уыдысты Ирон театры артисттӕ дӕр. Мӕ фыд Музыкалон театры зарӕггӕнӕг кӕй уыд бинонты хъуыддаг бакӕныны размӕ, уый та базыдтон ӕрӕджиау. — Театры аивадон разамонӕджы размӕ стыр хӕстӕ ӕвӕрд ис. Сфӕлдыстадон адӕмимӕ кусын уӕлдай зындӕр кӕй у, уый сусӕггаг нӕу. Фӕлӕ де ‘рбацыдӕй театр ныфсджын къахдзӕфтӕ кӕй кӕны, ивгъуыд аз спектаклтӕм иу иннӕйы фӕдыл къух бакӕнӕн дӕр кӕй нӕ уыд, уымӕн ӕвдисӕн уыдыстӕм мах дӕр. Цы дын ӕххуыс кӕны дӕ куысты? — Фыццаджыдӕр, мӕ алыварс цы зӕрдӕхӕлар, куыстуарзаг ӕмӕ цӕстуарзон ӕмкусджытӕ ис, уыдон. Адӕмы уарзондзинад. Сӕйрагдӕр та — мӕ уарзондзинад театралон аивадмӕ, цардмӕ, адӕммӕ. Зындзинӕдтӕ адӕймагимӕ ӕмдзу фӕкӕнынц цӕрӕнбонты, фӕлӕ сыл лӕг хъуамӕ йӕ зонд ӕмӕ лӕгдзинады руаджы уӕлахиз кӕна. Сфӕлдыстадон адӕймаг та хъуамӕ йӕхицӕн ма лӕггад кӕна, фӕлӕ аивадӕн! Уӕд дзы ӕнтыстытӕ дӕр уыдзӕн ӕмӕ уӕлахизтӕ дӕр. Хицауы бандон адджын кӕмӕн у, уыдон та аивадӕй тынг дард сты. — Куыд дӕм кӕсы, цы хъӕуы абоны театрдзауы? — Театрдзауы хъӕуы ӕнкъарӕнтӕ, зӕрдӕйы хъарм, мидбылхудт, фӕнды йӕ артисты ӕцӕг дунейы февзӕрын, йӕ цардӕй ацӕрын. Адӕм тынг бафӕлладысты царды цӕхгӕр фӕзилӕнтӕй ӕмӕ сӕ фылдӕр хатт фӕфӕнды, театрмӕ ӕрбацӕугӕйӕ, удӕнцой райсын. Фӕлӕ уый ууыл дзурӕг нӕу, ӕмӕ театр йӕ репертуарӕй кӕй сисдзӕн трагедион пьесӕтӕ. Нӕ. — Цӕуыл дӕ сахуыр кодтой Ирон театры цӕлхдуртӕ? — Барын, уарзын ӕмӕ быхсондзинадыл. — Цавӕр ӕртӕ хорзӕхы ракурис Хуыцауӕй дӕ адӕмӕн? — Адӕмы ӕнӕниздзинад, хӕлардзинад ӕмӕ сӕрибардзинад. Стӕй ма дзы ракурин РӔСТДЗИНАД! Фыццаджыдӕр та мӕ арфӕ ракӕнын фӕнды ме ‘мкусджытӕн, нӕ зынаргъ театрдзаутӕн, нӕ республикӕйы цӕрджытӕн, ӕмткӕй райсгӕйӕ. Уымӕн ӕмӕ Ирон театр у нӕ иумӕйаг хӕдзар! Нӕ цинтӕ, нӕ бӕрӕгбӕттӕ дӕр сымахимӕ иу сты. Иууылдӕр Хуыцауы фӕдзӕхст ут! Фарн — уӕ алкӕй хӕдзары дӕр. Сӕрмагондӕй мӕ бузныг зӕгъын фӕнды нӕ республикӕйы дзыллон хабархӕссӕг фӕрӕзтӕй газеттӕ "Рӕстдзинад", "Северная Осетия", журнал "Мах дуг", ПТРК “Алани”-йӕн, 85 азы фӕндагыл немӕ ӕмдзу кӕй кӕнынц ӕмӕ нын нӕ алы ӕнтыст дӕр, бӕркадкъух ӕфсинау, адӕмы размӕ кӕй хастой, уый тыххӕй.
ХЕТӔГКАТЫ Оксанӕ