СМИ о нас

Search Our Site

Администратор: +7 (8672) 25-11-42 Касса: +7 (8672) 55-14-68

  • «Отелло». В.В. Тхапсаев
  • «Когда дрожит земля». В.В. Тхапсаев
  • «Сын Иристона». В.В. Тхапсаев
  • «Фатима». В.В. Тхапсаев
  • «Сын Иристона». В.В. Тхапсаев
  • «Отелло». В.В. Тхапсаев
Иу мæгуыр хæдзар, бинонтæ цы бахæрой, уый дæр сын нæй, афтæмæй бонтæ æрвитынц, кæрæдзийы хъуын-хъис хæрынц. Ус йæ ахуыргонд лæджы алы бон æфхæры сæ æдзæллагдзинады тыххæй, сæ иунæг фырты та кафын, хорз искуы рæстæг арвитыны мæтæй уæлдай ницы æндавы. Уæларт борщ æнæ къабуска… æппынфæстаг, сæхи ауындзынмæ æрцыдысты.

Афтæ райдыдта Ирон театры сценæйы не ‘мдугон азербайджайнаг зындгонд драматург Али Амирлийы дыууæархайдон эксцентрикон комеди «Хъæздыг сылгоймаг». Фæлæ фæстæдæр сæ цард аивта, æнхъæл дæр куыд ничи уыд, афтæ. Сæвæрдта йæ Азербайджаны республикæйы фæсивæдон театры аивадон разамонæг, режиссер, Азербайджан æмæ Хъалмыхъы республикæты аивæдты сгуыхт кусæг Бахрам Османов. Ам сæрмагондæй зæгъын хъæуы режиссеры профессионализмы тыххæй. Ирон æвзаг нæ зонгæйæ, Ирон театры сценæйы спектакл сæвæрын кæуылты хъуыддаг у. Театры хъомысджын артисттимæ кæрæдзийы ‘хсæн театралон аивады æвзагмæ рахизгæйæ, режиссер сæмбæлд йæ нысаныл.
Сценæйы дыууæ сахаты дæргъы цыд нæрæмон монцтæ æмæ царды цыбæлты тох. Бинонтæ æвиппайды схъæздыг сты, фæлæ фесæфт сæ иугæнæг фарн. Пьесæйы хъайтарты уæлмонц архайд афтæ стыхджын вæййы, æмæ нал фенкъарынц царды æцæгдзинад æмæ рæсугъд фынты ‘хсæн арæнтæ. Бинонтæ мулчы фæдыл дугъы, фесафынц æппæты сæйрагдæр — сæ удты сыгъдæгдзинад. Али Амирли хорз банкъардта рæстæджы дадзинты цавд æмæ адæмы рæгъмæ рахаста царды æцæгдзинад. Æнæ æхца цæрын зын у, фæлæ уыдонимæ дæр æнцондæр нæу. Кад æмæ намысы бæрзæндтæм цæугæйæ, адæймаджы хотыхтæй иу ссис мулк.
Спектакл æвæрд æрцыд мæйы æмгъуыдмæ. Режиссер афтæ арæхстджынæй бавнæлдта, æмæ цыбыр рæстæгмæ хъазуатон куыстæй рантыст спектаклы премьерæ. Кассæты билеттæ балхæнæн нал уыд, рагацау уæйгонд æрцыдысты. Адæмæн цымыдисаг уыд, фыццаг хатт азербайджайнаг режиссер Ирон театры сценæйы цы спектакл сæвæрдта, уый фенын. Бæгуыдæр уый у историон цау, уымæн æмæ раздæр ахæм сфæлдыстадон æмгуыстад никæд уыд азербайджайнаг æмæ ирон театрты ‘хсæн. Уым арфæйаг у нæ театры аивадон разамонæг Колыты Владислав, уымæн æмæ уый уыд йæ хъæппæрис. Фидæны та Азербайджайнаг театры сценæйы нæ режиссертæй иу сæвæрдзæн ирон спектакл сæхи æвзагыл. Бахрам премьерæйы агъоммæ фæсæмбæрзæны æнæдзургæйæ дыууæрдæм рацу-бацу кодта йæ тыхстæй. Фæлæ кæронбæттæны адæмы цæсгæмттыл удæнцойдзинад æмæ хъæлдзæг æнкъарæнтæ куы федта, уæд йæ цæсгом ныррухс, фæзындис ыл мидбылхудт дæр.
Артистты арæхстдзинадыл куы дзурæм, уæд сæ алчидæр, æмткæй райсгæйæ, сæххæст кодта йæ размæвæрд хæс. Сæйраг ролты ахъазыдысты: Цæрикъаты Римæ — Евæ Зерлинская, Битарты Алыксандр — Саухалты Бур, Коцты Хъазыбег — Саукуыдз, Æлбегаты Алан — Адвокат, Тлатты Темыр — Мукара, Цæллагты Сослан — Дзибус. Ноджыдæр ма: Тыбылты Анжелæ, Саулаты Иннæ, Дарчиты Хетæг, Кæсæбиты Дианæ, Дзубиаты Ларисæ, Хамыхъоты Фатимæ. Спектаклы нывгæнæгсценограф у РЦИ-Аланийы аивæдты сгуыхт архайæг Эммæ Вергелес.
Цæрикъаты Римæйæн Евæ Зерлинскаяйы фæлгонц у, цы ролты ахъазыд ныронг, уыдонæн сæ сæйрагдæр, æмæ йыл тынг зæрдиагæй бакуыста. Театрдзаутæ баууæндыдысты йæ цæнкуылкъах æмæ йæ царды мæгуырдзинадыл. Фæстагмæ нæ разы æрлæууыд бынтон æндæрхуызонæй, бæллиццагæй. Йæ бон иу удæй равдисын бацис дыууæ ирд фæлгонцы: мæгуыр, цардæфхæрд æмæ милуанты хицау сылгоймаджы.
Æлбегаты Аланы ацы спектаклы дардтой йæ къæхтæ. Йæ сценикон пластикæ, йæ æрдзæй лæвæрд курдиат æмæ арæхстдзинад та театрдзаутæн æрхастой ног уæлмонц æнкъарæнтæ. Адвокат сарæзта æппæт мадзæлттæ дæр бинонты хъысмæты куырмæлхынцъытæ райхалыны тыххæй.
Битарты Алыксандр нæ разы æрлæууыд мæгуыр профессоры сурæты бацæугæйæ. Хъазы доны баппарæгау ын сценæ фестад царды денджыз. Æрмæст уый нæ фæцудын кодтой милуан доллæры сæ койæ, фидар лæууыд фæлварæнты ныхмæ æнæбасæтгæйæ. Фæлæ кæронбæттæны хъазæндзастимæ мидбылхудт театрдзауы бафтыдта арф хъуыдытыл. Цы зæгъынмæ хъавыдысты автор, режиссер æмæ хъайтар уымæй? Æвæццæгæн, уый, æмæ уæлдай нæу, хъæздыг дæ æви мæгуыр, адæймагдзинады миниуджытæ химидæг бахъахъхъæнын у сæйрагдæр!
Спектакл фæцис лæг æмæ усы чындзæхсæвæй. Уыцы бон чындзæхсæвы азарынмæ Бакуйæ æрцыд Азербайджаны республикæйы сгуыхт артист, зарæггæнæг Ильхам Асадов æмæ акодта ирон зарæг. Уый театрдзауты зæрдæмæ тынг фæцыд, æмæ йын ракодтой арфæтæ.
РЦИ-Аланийы культурæйы министры хæдивæг Дудайты Чермен республикæйы Сæргълæууæг Битарты Вячеславы номæй арфæ ракодта хуынд режиссерæн æмæ йæ схорзæхджын кодта Арфæйы гæххæттæй. Спектаклæн аргъ скæнынмæ æрбацыдысты нæ республикæйы цæрæг азербайджайнæгтæ æмæ сæ æхсæнады сæрдар Фуад Казимов. Уый адæмы номæй бузныг загъта театры аивадон разамонæг Колыты Владиславæн, дыууæ республикæйы ‘хсæн хæлардзинады ахастдзинæдтыл зæрдиагæй кæй архайы, аивады хъарутæй пайда кæнгæйæ, уый тыххæй, æмæ йæ схорзæхджын кодта Кады гæххæтт æмæ зæрдылдарæн лæварæй. Ахæм кад скодтой се ‘мзæххон режиссерæн дæр.
Спектаклы иннæ премьерон равдыст уыдзæн 14 мартъийы 19 сахатыл.
ХЕТÆГКАТЫ Оксанæ


По материалам газеты «Рæстдзинад».